Welcome To KVVES Kollam

ആമുഖം

കേരള വ്യാപാരി വ്യവസായി കൊല്ലം ജില്ലാ കമ്മിറ്റിയുടെ ഔദ്യോഗീക വെബ്സൈറ്റിലേക്കു സ്വാഗതം. കൊല്ലം എന്ന ഭൂപ്രദേശത്തിന് ഭാരത ചരിത്രത്തിൽ അനന്യമായ സ്ഥാനമാണുള്ളത്. കൊല്ലം എന്ന പ്രദേശത്തിന്റെ വ്യാപാര സാധ്യതകൾ തിരിച്ചറിഞ്ഞ സ്വദേശികളും വിദേശികളുമായ അനേകം ഭരണകർത്താക്കൾ ഈ നാടിന്റെ വശ്യഭംഗിയിലും വ്യാപാര സാധ്യതകളിലും ആകൃഷ്ടരായി എന്നത് ചരിത്രം. കൊല്ലത്തിനോടുള്ള അവരുടെ അഭിനിവേശം പല യുദ്ധങ്ങൾക്കും രാജ്യങ്ങളുടെയും ഉത്ഭവത്തിനും തകർച്ചയ്ക്കും കാരണമായി എന്നതും ചരിത്രം. മറ്റേതൊരു പ്രദേശത്തിന്റെയും എന്നപോലെ കൊല്ലത്തിന്റെ ചരിത്രവും ഈ നാട്ടിലെ വ്യാപാരത്തിന്റെയും ഇവിടുത്തെ വ്യാപാരികളുടെയും ചരിത്രം കൂടിയാണ്. സമുദ്രത്തോടുള്ള നാടിന്റെ അടുപ്പവും പ്രകൃതി ദത്തമായ തുറമുഖവും കാരണം അനന്തമായ വ്യാപാര സാധ്യതകൾ ഉള്ള നാടായി വളരെ പണ്ട് മുതൽക്കേ കൊല്ലം അറിയപ്പെടുവാൻ ഇടയായി.
വേണാട് രാജ്യത്തിന്റെ തലസ്ഥാനമായിരുന്ന കൊല്ലം അതിന്റെ രൂപകർത്താവ് ആയിരുന്ന ജയസിംഹനിൽ നിന്നും ഉത്ഭവിച്ച 'ജയസിംഹ നാട് ' പിന്നീട് ദേശിങ്ങനാട് ആയി കരുതപ്പെടുന്നു. സുഗന്ധ ദ്രവ്യങ്ങളുടെ വിപണന കേന്ദ്രമായിരുന്ന വലിയങ്ങാടിയും തുറമുഖവും ജലാശയങ്ങളും എല്ലാം കൊല്ലം എന്ന ഭൂപ്രദേശത്തിന്റെ മഹിമ വൻകരകൾക്ക് അപ്പുറത്തേക്ക് എത്തിച്ചു. റൊമാക്കാർ, ഫിനിഷ്യർ, അറബികൾ, പോർച്ചുഗീസ് , ഡച്ച്, ബ്രിട്ടീഷുകാർ തുടങ്ങിയവർ കാലാകാലങ്ങളിൽ കൊല്ലം എന്ന പ്രദേശത്തിന്റെ മേൽ അധീശത്വം സ്ഥാപിച്ചു. 1741 വരെ തിരുവിതാംകൂറിന്റെ തലസ്ഥാനമായിരുന്ന കൊല്ലം, തുടർന്ന് വന്ന ബ്രിട്ടീഷ് ഭരണത്തിൻ കീഴിൽ വ്യാപാര രംഗത്തും ഇതര രംഗങ്ങളിലും കൂടുതൽ ശ്രദ്ധ നേടി. തിരുവിതാംകൂറിലെ ആദ്യ റെയിൽവേ ലൈൻ ആയ കൊല്ലം ചെങ്കോട്ട പാത (1904) പുനലൂർ തൂക്കു പാലം (1877) കേരളത്തിലെ ആദ്യത്തെ വിമാന താവളം (ആശ്രാമം ) ഒക്കെ കൊല്ലത്തിന്റെ സമ്പന്നമായ ചരിത്രത്തിലെ നാഴികക്കല്ലുകൾ ആണ്.
ശ്രീ നാരായണ ഗുരു, ശ്രീ. അയ്യങ്കാളി, വേലുത്തമ്പി ദളവ തുടങ്ങിയ സാമൂഹ്യ പരിഷ്കർത്താക്കളുടെയും നവോത്ഥാന നായകരുടെയും ഉറച്ച ആഹ്വാനങ്ങൾക്ക് ആദ്യം ചെവികൊടുത്ത തലമുറകളുടെ നാടാണ് കൊല്ലം.

കൊല്ലവും വ്യാപാരി സമൂഹവും

സ്വതന്ത്ര ഭാരതത്തിൽ കൊല്ലം ജില്ലയിലെ വ്യാപാരികൾ, സമ്പന്നമായ ഗതകാല ചരിത്രത്തിന്റെ സൂക്ഷിപ്പുകാരായി നിലകൊള്ളുന്നു എന്നത് സമീപകാല ചരിത്രം. ഒരു കാലത്ത് സ്വാർത്ഥതയുടെ പര്യായമെന്നോണം മുദ്ര കുത്തിയിരുന്ന വ്യാപാരി സമൂഹം ഇന്ന് സാമൂഹ്യ വ്യവസ്ഥിതിയുടെയും നാടിന്റെ വിപ്ലവകരമായ വികസനത്തിന്റെയും സ്ഥാനപതികൾ ആയി പരക്കെ അംഗീകരിക്കപ്പെട്ടിരിക്കുന്നു. 1930 കൾ മുതൽ പ്രദേശീകമായ വിഷയങ്ങൾ മുൻ നിർത്തി വ്യാപാരികളുടെ സംഘടനകൾ പല പേരുകളിൽ ജില്ലയിൽ പ്രദേശീകമായി രൂപപ്പെട്ടു. 1941ൽ കൊല്ലം മെർച്ചന്റ്സ് അസോസിയേഷൻ രൂപീകൃതമായി. പ്രസിഡന്റ്‌ ഷാ പലക്സി വാച്ച് രാജ്, സെക്രട്ടറി പ്രാക്കുളം കെ കുഞ്ഞുരാമൻ, ഷാ ശിവരാജ് ഗോപാൽ ജി സേട്ട് എന്നിവർ ആദ്യകാല നേതാക്കൾ ആയിരുന്നു. പിന്നീട് കൊല്ലം കേന്ദ്രീകൃതമായി പല സംഘടനകൾ രൂപീകൃതമായി. ജില്ലയിൽ ഉടനീളം പല സ്ഥലങ്ങൾ കേന്ദ്രീകരിച്ചും സംഘടനകൾ രൂപം കൊണ്ടു.

കേരളത്തിലെ വ്യാപാരി സമൂഹത്തെ ആത്‍മാഭിമാനത്തിന്റെ പാതയിലൂടെ കൈപിടിച്ചു നടത്തിയ നവോത്ഥാന പ്രസ്ഥാനം ആണ് കേരള വ്യാപാരി വ്യവസായി ഏകോപന സമിതി. ഉദ്യോഗസ്ഥ, രാഷ്ട്രീയ ചൂഷണങ്ങൾക്ക് വിധേയമായിരുന്ന ഒരു സമൂഹം സ്വയം തിരിച്ചറിഞ്ഞതിന്റെയും സംഘാതമായ വളർച്ച ലക്ഷ്യം വച്ച് സ്വയം നടത്തിയ മുന്നേറ്റത്തിന്റെയും ചരിത്രമാണ് കേരള വ്യാപാരി വ്യവസായി ഏകോപന സമിതിയുടേത്.

1981 ൽ രൂപീകൃതം ആയത് മുതൽ ചെറുകിട വ്യാപാരി സമൂഹം അവരുടെ വിവിധങ്ങളായ വിഷയങ്ങൾക്ക് ഉറ്റുനോക്കി വരുന്നത് ഏകോപന സമിതിയെയും അതിന്റെ നേതാക്കളെയും ആണ്. കൊല്ലം ജില്ലയിലും സ്ഥിതി വിഭിന്നമായിരുന്നില്ല. കേരളത്തിൽ ആദ്യമായി സെയിൽസ് ടാക്സ് റെയ്ഡിനെതിരെ 1997 ൽ നടന്ന സമരവും , തുടർന്നുള്ള വ്യാപാരികളുടെ അറസ്റ്റും ജയിൽ വാസവും ഏകോപന സമിതിയുടെ ജില്ലയിലെ പ്രവർത്തന ചരിത്രത്തിലെ ജ്വലിക്കുന്ന ഓർമ്മകൾ ആണ്. നിയമ വിരുദ്ധ കട പരിശോധനയ്‌ക്കെതിരെ ഏകോപന സമിതിയുടെ സംസ്ഥാന നേതൃത്വത്തിന്റെ ആഹ്വാന പ്രകാരം പ്രതിരോധിച്ച അൻപത്തൊൻപതു വ്യാപാരികളാണ് രണ്ട് ക്രൈം കേസുകളിൽ ആയി (Crime No. 1010/97, 1011/97) നവംബർ ഒന്ന് മുതൽ തുടർച്ചയായി അഞ്ച് ദിവസം ജയിൽ വാസം അനുഭവിച്ചത്. പിന്നീട് നാല് വർഷം നീണ്ട നിയമ യുദ്ധത്തിന് ശേഷമാണ് കേസുകൾക്ക് വിരാമം ആയത്.